Si Ujang Nyaba ka Leuweung
(ku: Agung Gumelar)
(ku: Agung Gumelar)
Si Ujang téh kasohor jalma anu ngedul lamun dinu masalah digawe.
Pagawéanana ngan sakur saré waé. Lamun geus dahar mah golédag deui saré di
pangkéngna. Kusabab kalakuanana siga kitu, mitohana kacida pisan sebelna ka Si
Ujang.
Hiji mangsa, sinarieun Si Ujang indit
ka leuweung. Maksudna mah rék néangan rejeki. Da kitu lumrahna, jalma anu geus
ti leuweung mah sok rébo ku babawaan.
Si Ujang geus anjog ka leuweung.
Manéhna ngan hulang-huleng baé geus di leuweung téh. Teu puguh naon anu deuk
dipigawé. Ari pék manéhna léos ka handapeun tangkal kai, rék ngadon reureuh da
cape. Rét Si Ujang téh ka luhur, dina dahan loba pisan manuk anu keur ngaub,
disadana patembal-tembal jeung manuk nu lain. Si Ujang resepeun pisan tur atoh
ningali manuk nu aya di luhur dahan nu keur silih ngaub patembal-tembal. Manéhna tuluy héhéotan
nurutan sora-sora manuk. Si Ujang tuluy leumpang deui bari ngahariring, teu
puguh deuk kamana tujuanna jeung teu puguh naon anu rék di pigawé.
Keur Si Ujang jongjon leumpang, manéhna nénjo aya sayang
odéng badag nu ngagantung dina tangkal kai. Reg eureun Si Ujang téh dina
handapeun tangkal kai nu aya sayang odéngna. Tuluy Si Ujang mencrong éta odéng.
Indungna rabul tina sayangna. Éta odéng teh aya nu kaluar, aya nu ka jero
arasup bari marawa madu beunang nyeuseup tina kekembangan téa. Si Ujang anteng
baé nénjo éta odéng. Sakapeung mah Si Ujang téh sok seuseurian sorangan, éta
cenah pédah sora odéng téh ngaguruh jiga kapal udara. Ku sabab anteng teuing, Si
Ujang ngadon kasaréan.
Pasosore, Si Ujang kakara balik ka
imahna. Mitohana geus aya dina lawang panto, tuluy nanya ka Si Ujang.
“Heh
Ujang, balik ti mana ai manéh meuni burit-burit teuing?”
“Ti
leuweung, Bah.” bari reuwas Si Ujang ngajawab.
“Naon
maksud ka leuweung téh?”
”Ah hayang wé Bah, sugan wé meunang
rejeki balik ti leuweung téh” ceuk Si Ujang téh.
“Cing
meunang naon atuh balik ti leuweung téh?”
“Teu
meunang nanaon ah, Bah.”
“Naha
teu meunang nanaon? Da saré meureun nyak manéh mah di leuweung téh?”
“Hen..
henteu Bah.” jawab Si Ujang bari sieun kapanggih ngabohong.
“Ah
bohong siah.”
“Saré
kétang Bah saeutik.”
“Teu iraha teu dimana maneh mah
pagawéan téh ngan saukur saré jeung saré wé. Teu manggih nanaon di leuweung
téh?”
“Manggih Bah, manggih odéng, sayangna
meni badag siah Bah.”
“Mana maduna atuh Ujang?”
“Madu?” Si Ujang héraneun.
“Bodo manéh mah, Ujang. Engké mah ari
manggih odéng teh ala maduna.”
“Sieun nyeureud ah, Bah.”
“Gampang, duruk wé buntutna.” ceuk
mitohana bari jéngkél.
Isukna Si Ujang geus indit deui ka
leuweung deuk néang deui éta odéng. Koja mitohana dibawa keur wadah maduna.
Geus neangan kukurilingan di leuweung, sayang odéng téh teu kapanggih. Si Ujang
terus aprak-aprakkan di leuweung. Manéhna nenjo uncal nu keur héés dihandapeun
tangkal. Si Ujang ujug-ujug inget kana papatah mitohana.
“Awas
siah, di duruk buntutna ku aing.” ceuk Si Ujang bari ngadeukeutan éta uncal.
Kusiwel Si Ujang téh ngodok panékér
dina saku calanana. Tuluy ngahurungkeun tapas kalapa garing. Keteyep manéhna
ngadeukeutan uncal nu keur héés tibra pisan. Kojana dikaitkeun kana tanduk
uncal. Teu lila, buntut uncal téh diduruk ku Si Ujang. Puguh baé uncal téh
reuwaseun, tuluy ngajleng luncat bari kabur.
Si Ujang teu meunang nanaon deui.
Manéhna langsung balik lantaran geus lapareun. Terus bébéja ka mitohana yén kojana
dibawa kabur ku uncal. Mitohana kacida pisan jéngkél ka Si Ujang ngadéngé
pamolah minantuna kitu. Si Ujang dicarékan ku mitohana tapi teu didéngé. Léos
wé manéhna mah ka dapur dahar nepi ka kamerkaan. Jiga biasa, Si ujang tuluy
saré deui pas geus dahar.
Tidak ada komentar:
Posting Komentar